Lógin fyri Landsfelag Sjávstýrisfloksins

Løgd fram á aðalfundi í Runavík 6. mei 2000

Góðkend á eykaaðalfundi í Havn 2. desember 2000

§ 1

Navn

Navn felagsins er Landsfelag Sjálvstýrisfloksins

§ 2

Endamál

Endamál felagsins er:            -at styrkja sambandi millum tingmanning floksins og økisfeløgini,

                                            -at verja hugsjónina og

                                            -at menna Sjálvstýrisflokkin, herundir økis- og ungmannafeløg.

§ 3

Limaskapur

Øll sjálvstýrisfeløg, eitt økisfelag í hvørjum valdømi, sum eru góðkend av landsfelagnum, kunnu gerast limir. Onnur góðkend sjálvstýrisáhugað felø1g, herundir ungmannafeløg, kunnu eisini gerast limir. Í valdømum har eingi økisfeløg eru, kunnu einstaklingar gerast beinleiðis limir.

§ 4

Aðalfundur/Landsfundur

Aðalfundurin er hægsti  myndugleiki felagsins.

Stk.2.  Reglan er, at aðalfundur og landsfundur verður hildin á hvørjum ári í oktober og skal boðast lokalfeløgunum og limunum í Landsfelagnum við 4 vikurs freist innan fundin. Limafeløgini boðað sínum limum til fundar.

Stk.3.  Øll sum taka undir við hugsjónum floksins hava atgongd til aðalfundin.

Stk.4.  Atkvøðurætt hava allir limir, sum eru skrásettir í lands- ella økisfelag. Aðalfundurin er viðtøkuførur, tá ið minst 3 nevndarlimir eru møttir, tó skulu teir umboðað í minsta lagi helmingin av floksins atkvøðum til seinasta løgtingsval.

Stk.5.  Viðvíkjandi vali av floksformanni og næstformanni, og viðvíkjandi lógarbroyting av mannagongdini til slík val, er atkvøðumegin tó skipað soleiðis, at umframt ásetingarnar í stk. 4, fáa valdømisumboð ein atkvøðuseðil afturat fyri hvørjar byrjaðar 100 atkvøður (umboðsatkvøðurnar). Løgtings- og landsstýrisumboð hava 4 atkvøður hvør.

Stk.6.  Uppskot til aðalfundin skulu vera landsnevndini í hendi innan 1. september.

Stk.7.  Mannagongdin á aðalfundi er henda

1.   Val av fundarleiðara.

2.   Val av fundarskrivara, sum skrivar fundarfrágreiðing.

3.   Kunngerða/skipað fyri hvør, ið ger uppskot til fundarsamtykt.

4.   Frágreiðing frá formanninum. Herundir upplestur frá fundarfrágreiðingini frá seinasta fundi.

5.   Framløga av grannskoðaðum roknskapi.

6.   Val av grannskoðara.

7.   Møgulig dagføring av stevnuskrá/virkisskrá floksins.

8.   Fíggjarætlan fyri komandi ár.

9.   Val av floksformanni og/ella næstformanni.

10. Fráboðan av nevndar- og tiltakslimum.

11. Val av tveimum starvsnevndarlimum.

12. Viðgerð av innkomnum málum.

13. Ymiskt.

                      - Aðalfundurin lokin -

Stk.8.  Mannagongdin á landsfundi er henda

1.  Frágreiðing løgtings- og landsstýrismanna.

2.  Politiskt orðaskifti.

3.  Framløga av fundarsamtykt, sum skal góðkennast av floksformanninum.

4.  Fundarbókin verður undirskriva av skrivara og fundarleiðara.

Stk.9.  Fjølmiðlar hava atgongd til landsfundir eftir avtalu við landsnevndarformannin.

Stk.10.  Eykaaðalfundur kann krevjast av floksformanninum, formanninum í landsnevndini, av trimum nevndarlimum í landsnevndini ella av í minsta lagi 30 flokslimum til at verða í fyrsta lagi vikudagin eftir og í seinasta lagi 28 dagar eftir, at hann er kravdur.

Stk.11.  Aðal- og landsfundarfrágreiðing og møgulig fundarsamtykt saman við viðkomandi adressum, telefonnr., faxnr., teldupostadressum v.m. hjá

1. landsfelagnum,

2. starvsnevndarlimunum,

3. økisfeløgunum,

4. øðrum nevndum,

5. ting- og landsstýrisfólkum v. fl.,                                                                                                                                                                                   

verður av skrivara landsnevndarinnar send øllum nevndunum seinast 14 dagar aftaná fundin.

§ 5    Floksformaður og næstformaður

Floksformaðurin og næstformaðurin verða valdir beinleiðis á aðalfundi. Floksformaðurin hevur sæti í landsnevndini. Floksformaðurin er politiski framsøgumaður og løgmansevnið floksins. Floksformaðurin og næstformaðurin standa altíð fyri vali á tí árliga aðalfundinum.

Stk.2.  Uppstillað eigir at verða millum floksins ting- og landsstýrisumboð til floks- og næstformann, um hetta ber til. Ting- og landsstýrisfólk kunnu eisini stilla upp av sínum eintingum.

Stk.3.  Landsnevndin boðar frá uppstillingunum í útsendari fundarskrá til økisfeløgini, og eigir hon at senda feløgunum skránna 4 vikur innan aðalfundin.

Stk.4. Atkvøðugreiðslan millum valevnini verður avgjørd við meiriluta av atkvøðum tillutaðar eftir § 4 stk. 5. Eru fleiri enn tvey valevni, og einki av teimum fær greiðan meiriluta, verður valt millum nummar eitt og tvey. Stendur á jøvnum millum teir, skipar starvsnevndin enn einaferð fyri umvali beinanvegin. Fæst ikki meiriluti tá, verður lutakast á sama fundi.

§ 6  

Landsnevndin

Hvørt økisfelag/valdømi velur ein nevndar- og ein tiltakslim í landsnevndina og sendir landsfelagnum skrivliga fráboðan. Har einki virki felag er, ger landsnevndin tilmæli til aðalfundin um umboðan valdømisins. Landsfelagið fyri Unga Sjálvstýri velur ein lim. Politiski floksformaðurin situr eisini í landsnevndini sambært § 5.

Stk.2. Nevndarlimir og tiltakslimir verða tilnevndir fyri tvey ár í senn. Annað hvørt ár verða 3 nevndarlimir og tiltakslimir, og annað hvørt ár verða 4 nevndarlimir og tiltakslimir valdir. Unga sjálvstýrið velur sín lim á hvørjum ári.

Stk.3.  Nevndin skipar seg við formanni og varaformanni, ið ikki sita á tingi ella í landsstýrinum. Skrivari og kassameistari felagsins verða valdir av nevndini fyri eitt ár í senn og hava ikki atkvøðurætt á fundi, um teir ikki eru valdir í nevndina.

Stk.4. Nevndin eigir m.a. at

1. gera eina fundarskipan ið verður førd í gerðabókina,

2. fremja tað, ið henni er álagt av aðalfundinum,

3. vera økis- og ungmannafeløgunum til hjálpar,

4. stuðla tá ið stilla verður til val,

5. luttaka í samráðingum um skipan av landsstýri,

6. umsita pening veittum flokkinum, so sum studning til politiska upplýsing og at

7. hava greiðan politikk og viðgerðarhátt viðvíkjandi stuðulsumsóknum frá økisfeløgum.

Stk.5.  Felagið verður bundið av undirskrift landsformansins og ávikavist næstformanni ella skrivara. Tó skal aðalfundarsantykt til fyri at skuldbinda felagið.

Stk.6.  Nevndin hevur fund so ofta, sum formaðurin heldur tað vera neyðugt, ella tá minst tveir av hinum limunum ynskja tað. Og nevndin hevur fund, um ein av løgtings- ella landsstýrisumboðunum ynskja tað.

Stk.7.  Starvsnevndarlimir, løgtings- og landsstýrisumboð floksins eiga altíð at fáa fundarboð. Tað sama geldir varalimir, ið hava biðið um at fáa fundarboð. Frávik kann gerast frá hesi meginreglu.

Stk.8.  Fundur verður boðaður við 8 daga freist, og nevnd verða tey mál, ið viðgerðast skulu á fundi, soleiðis at umboðið hevur høvi til at viðgera málini í sínum økisfelag. Frávik frá tíðarfreistini kunnu gerast undir serligum umstøðum.

Stk.9.  Nevndarfundir og -avgerðir verða førdar í bók, ið verður undirskriva av limunum, sum møttir eru, og skal fundarfrágreiðing sendast økisfeløgunum til kunningar.

Stk.10. Allar atkvøðugreiðslur verða avgjørdar við vanligum meiriluta. Atkvøða landsfelagsformansins er avgerandi um tað stendur á jøvnum. Í prinsippiellum politiskum málum verður tí politiska floksformanninum litin sýtingarrættur til. Slík mál kunnu skjótast út til ein eykaaðalfund.

Stk.11.  Nevndin er viðtøkufør tá ið formenninir og tveir nevndarlimir eru møttir.

§ 7

Starvsnevndin

Starvsnevndin er ein 5-mannanevnd. Tveir limir verða valdir á aðalfundi, landsnevndin útnevnir tveir sínámillum og Unga Sjálvstýri útnevnir ein. Hesir verða valdir fyri eitt ár fram til næsta aðalfund. Nevndin ger sína egnu fundarskipan, sum verður førd í gerðabók, og skipar seg sjálv við formanni, næstformanni og skrivara.

Stk.2.  Landsnevndin kann í samráð við ella eftir tilmæli frá starvsnevndini útnevna lim/ir fyribils í starvsnevndina, um tað verður mett at tæna neyðuga virkisføri hennara.

Stk.3.  Nevndin hevur felags kassameistara og roknskap við landsfelagið.

Stk.4. Starvsnevndin ger tilmælir til og fremur umbidnar uppgávur frá landsnevndini. Hon skal vera øllum nevndum Sjálvstýrisfloksins ein samanhangandi stuðul undir tí dagliga politiska arbeiðnum og fremja valskrá floksins best møguliga í verki.

Stk.5.  Starvsnevndin skipar m.a. fyri og kallar allar felagsformennirnar í Sjálvstýrisflokkinum til samstarvsfundir.

Stk.6. Allar atkvøðugreiðslur verða avgjørdar við vanligum meiriluta. Atkvøða starvsnevndarformansins er avgerandi um tað við eina atkvøðugreiðslu stendur á jøvnum. Nevndin er viðtøkufør um 3 limir eru møttir.

§ 8

Lógarbroyting

Uppskot um lógarbroytingar verða sendar økisfeløgunum til kunningar minst 4 vikur áðrenn aðalfundin. Allar lógarbroytingar skulu góðtakast av tveimum viðtøkuførum aðalfundum.

Stk.2.  Endalig avtøka av felagnum skal samtykkjast av tveimum fylgjandi aðalfundum lýstir sambært reglunum. Ognir felagsins verða latnar vælgerandi endamáli. Um 10 limir á slíkum aðalfundi ynskja at varðveita felagið, kann tað tó ikki avtakast.